الفن المصرى لن ينهزم
- Rana Rashed
- May 25
- 2 min read
الهدف من الكدمه ده؟
أولاً، حابه أشكُر كل الناس الجميلة، اللى قلقت عليا، و هروا التليفون اتصالات أول ما شافوا الفيديو.
خاصة صديقي العزيز حَمو، اللى جه على أول شارع الساعة ٣ الفجر بعد ما خلص شغل و لمح الفيديو، و هو جاهز يتخانق مع اللى عمل فى عيني كده 😂♥️
ثالثاً و ده الأهم، الكدمة ده انا عملتها بالماكياج، قبل ما أروح مؤتمر أتكلم عن العنف ده المرأة، و حسيت إن عمل الكدمة، هيوثق الشعور اكتر و انا بتكلم، و هيحسس الحاضرين بوجع المرأة، بعد ما تتعرض للعنف، و نجحت فى الهدف ده جداً الحمدلله، لدرجة إن دكتورة كبيرة كانت دموعها بتنزل طول المحاضرة من شكل عيني، و ده تأثير متوقعتوش.
بعدها رجعت البيت زي كل يوم، وحيدة و ساكته، البيت حواليا هادي خالص، مفيش غير منظر الحيطان، و اللوحات الفنية اللى رسمتهم، عشان أونس نفسي.
فتحت التلفيزيون زي كل يوم، عشان أصدقائي الفنانين، يهونوا عليا وحدتي و انا بتعشا.
اللى شوفته ضايقني، و قلقني على مصر، حسيت بكل وضوح (كشخص متصل، بيعرف يربط النقاط كويس)، إن فى مؤامرة ثقافية بتتعمل على مصر، هدفها تشويه الفن، و سرقة الحضارة، اللى بقالنا سنين بنبني فيها.
وقتها فتحت الكاميرا من غير ما أحس، و عملت الفيديو اللى هحطلكم الرابط بتاعه تحت البوست ده.
الفنان انسان، انسان مسكين، مُعَذَب، انا اكتر حد فاهمه، يمكن مكونش فنانة مشهورة، بس إتولدت بروح فنانة...بتحس كل حاجة زيادة عن اللزوم...محدش بيفهمها معظم الوقت، او نادراً اصلاً لما حد يفهمها. حتى أقرب الناس ليها.
بس لما برسم او بعمل محتوى روحاني، بحس إنى عايشه، بحس انى بتنفس...بكون فى عالم، كل الناس فيه بتختفي، و بشوف فيه ربنا بس، اللى إداني الموهبة ده، عشان مموتش.
الفنانين كائنات معذبة جداً و وحيدة، بيصرفوا ملايين، و سنين، و وقت كان ممكن يدوه لنفسهم، عشان يقدمولنا فن، ينقذنا من قسوة الواقع، بدون اي مجهود حقيقي مننا.
قصاد كل ده، فئة من القساة و المتطرفين عقلياً، عايزين يشوههوهم، يقضوا على مسيرتهم، و يدفونهم جوه أخطائهم البشرية!
ليه كل ده؟ ليه بتحاربوهم اوى كده؟ و ليه بتستنوا منهم يكونوا ملايكه؟
و انتوا اصلاً بشر خطائين!
الكدمة ده، بتعبر عن وجعي، و عن وجعهم،
و عن وجع اي انسان، بيحاول يحط فن،
فى بيئة مليئة بالكره و الظنون.
الكدمه ده انا مسحتها بسهولة، لكن فى كدمة تانيه جوه قلبي، مبيمسحهاش غير الفنانين.
و الفيديو ده، مش محتوى ولا محاولة جذب إنتباه.
بل هو مجرد، هدية إمتنان من روحي لروحهم الرقيقة!
⭐️ الفنانين المصريين- كاريزما تُدَرَس 📚
رنا راشد
Comments