استوصوا بالنساء خيراً

عايزه أقول كلمة سريعة:

متعذبوش بناتكم، أرجوكم متعذبوش بناتكم!

متذلوش بناتكم لدرجة تخليهم يسيبوا بيوت أهاليهم...عشان بس يهربوا من العنف و الظلم، و العنف مش شرط يكون ضرب بالإيد او أذى جسدى مباشر!

العنف اللى بالكلام و إيذاء الشعور، و المعايره! يجرح البنت اكتر من اي ضرب بالإيد. الأذى النفسي بيقتل من غير مد إيد فى صمت!

قبل ما تطلبوا مهر و مؤخر و مقدم و قايمه من العريس...رجاءً:

علموا بناتكم يحبوا نفسهم، عززوهم، أملوا عيونهم و قلوبهم بالخير قدر المستطاع، فى حدود إمكانياتكم.

عشان لما يقابلوا راجل عايزهم بس عشان شهوة يومين او شهور معدودة، حتى لو هيكتب عقد جواز! البنت تقدر ترفض و تقول مش عايزه...و تجري تانى على حضن أهلها...بدل ما تجري على حضن الغريب، من كُتر خوفها من أهلها.

اتقوا ربنا فى بناتكم، دول عرضكم، و هتتحاسبوا عليهم!

و كما قال أفضل الخلق، سيدنا محمد

(عليه الصلاة و السلام)

و كررها ثلاث مرات لحظات موته:

استوصوا بالنساء خيراً

استوصوا بالنساء خيراً

استوصوا بالنساء خيراً

تم.

♾️

رنا راشد

#واحة #الشفاء