الشخصية الحقودة

📌 تعريف الشخص الحقود:

الشخص الحقود هو شخص مسكين جداً فى دماغه، شخص مهما ربنا رزقه، و مهما كان عنده او عندها من نِعَم- مبيشبعش!

الشخص ده بمجرد ما يشوف إن أي حاجة كويسه حصلتلك فى حياتك- حتى و لو بعد فترة من التعب.

يبتدي يِشِن حرب عليك من كل الجهات جوه دماغه و فى المجتمع، لمجرد بس إنه مكيود او إنها مكيودة منك- لكنهم أجبن حتى من إنهم يعترفوا بمشاعرهم الإنسانية من الغيرة و الحقد. بيغلفوها دايماً تحت غطاء جُمَل زي:

• يا أخى أنا معرفش مبحبش فلان او فلانه ليه؟! (لإنك متكاد منهم).

• يا أخى فلانه ده أخلاقها مش كويسه او بتعمل تصرفات غريبة، رغم إن البنت بتكون قمة فى الإحترام (لانك متكاد منها).

• يا أخى فلان ده على قلبه فلوس قد كده! هو لسه بيشتغل و عايز ينجح؟! (لإنك متكاد منه).

• يا أخى الست ده مسترجلة و ناشز، لمجرد إنها ناجحة و بتشتغل (لإنك متكاد منها).

و وجب العِلم، إن بينما إن الغيرة شعور إنساني و مبرر، طول ما هي فى حدود الشعور و بعيدة عن أذى الغير، بالفعل او اللسان.

لكن، الكيد طاقة شيطانية جداً، و (أشَاشَه): يعني بِتقُش الأخضر و اليابس من مشاعر جوه قلب الكياد. بتحرق أخر ذرة إنسانية جوه قلوبهم، و بتحولهم لشياطين متحركة ممكن تعمل اي حاجة،

عشان تكسب اللعبة. او تِوَقَع الإنسان اللى متكادين منه او منها فى الغلط، حتى لو هما مش غلطانين.

بينما الغيرة و الحسد مشاعر ممكن الإنسان يصرفها عن نفسه، بذكر ربنا و الاستعاذة بالله من الشيطان الرجيم، و (الثقة و الرضا عن النفس).

الكيد هو تَمَني زوال النعمة عن المحسود، و ممكن يتطور لمحاولة إخفاق محاولاته او محاولاتها فى النجاح.

نستعيذ بالله من الكيد و الكيادين و ألاعيب الشياطين. و بنسأل ربنا إنه يجعل طاقتنا دائماً مُرَكَزة على أنفسنا و تطوير ذواتنا من الداخل.

📌 هل قابلتوا الشخصية الكيادة قبل كده كعمال نور؟؟

📌 و يا ترى إتعاملتوا معاهم ازاي؟

كل الحب،

رنا راشد

#واحة #الشفاء