طريق الحب (للمجروحين)

لما تتولد فى بيت أنت مش متشاف فيه...

لما تتربى من أب و أم مش ملحقوش حتى يربوا نفسهم

لما تتعب اوى عشان توري روحك لعالم مش بيشوف غير مظاهر!

نصيحتي ليك: متحاولش، متمثلش، متفتكرش إن الدنيا كريمة و هتديك الحب ببلاش.

حِب موهبتك، حِب وطنك، حِب نفسك...لغاية ما تقابل حد يحبك بجد.

متقبلش!! إنك تكون صورة على الرف! ولا ان حد يختارك سد خانة! ولا حد يكمل شكله الإجتماعي بيك!

اللى إتولد وسط أم و أب شحنوه حنان و إهتمام و حب،

مش زي أبداً اللى اتربى مش متشاف و كإنه يتيم!

عمرهم ما هيتساووا، حتى لو المجتمع نفسه يبين كده، عشان يبان عادل!

بس العدل دايماً مش هو المساواة!!

اللى جواه جرح إهتمام بينزف، اللى إتساب سنين من أهله، اللى اتهجر و اتجرح من اهله:

مينفعش اطلب منه يتحب عادي! مينفعش اطلب منه يقبل بالموجود! مينفعش اقوله بتطلب اهتمام كتير ليه؟! بتشك فى نفسك طول الوقت ليه؟!!

حب نفسك! خليك هيرو! خليك جامد و اناني و اختار نفسك!

كلام بجم كله معلب و مغيب! لا يغنى ولا يشفي من جوع!

الخلاصة:

اللى متشحنش حب من المصدر، مش هياخد حب كامل، غير لما يلاقي الحب الكامل، مع حاجة غير البشر...الأول...و بعدها، طاقة الحب هتتفتح قدامك.

عالج الجرح و نضفه، قبل ما تغطيه بقطن و شاش!

رنا راشد

#واحة #الشفاء