هلاوس فكرية

عرفت بعد سنين كتير اوى من الصراعات الواهيه، و السفريات الكتيره، و الشحططه بين تحت و فوق...

إنى مش شبه كل توقعاتهم!  إنى كنت أستاهل أتحب، و مكنتش أستاهل، إنهم ينططوني من وسط كل أطواق النار ده...عشان بس أعجبهم.

عرفت إنى إنسانه بسيطه، عايزه أعيش حياة بسيطة، أكل لقمة خفيفه، ألبس هدمه مريحه، و أشرب كوباية شاي حنينه لحظة العصاري مع حد بحبه.

كانوا بيستخدموني، زي الطور فى ساقية، عشان أحقق مغارضهم و أحلامهم...و أنا كنت زي الحماره،

فاكره إن هو ده الحب!

كنت بحاول أعجب ناس، كارهين نفسهم!

بيغطوا سواد قلوبهم بالفلوس.

الحب إنك تعيش طول عمرك، تتلون و تتغير و تتشال و تتحط، عشان حد فاشل، كاره نفسه، يرضى عنك اخيراً! و يشوفك ناجح...لما تركب العربيه اللى هو نفسه فيها، و تعيش فى بيت يشرفه هو، و تتكلم بطريقته، و تاكل و تشرب على مزاجه، مش على مزاجك انت!

اكتشفت انى كنت أكبر حمار ذكى جداً خلقه ربنا فى هيئة بشر!

و النهارده بتمرد...يمكن بعد فوات الأوان، بعد فوات عمري...يمكن لسه فاضل أيام...و لسه فاضل ناس...

هيحبوني زي ما أنا؟ ولا هما كمان...هيطلبوا مني أكون حد تانى؟ عشان أعجبهم.

رنا راشد

#واحة #الشفاء