جبان
- Rana Rashed
- Dec 11, 2025
- 1 min read
أنتَ يَلي بتتهزِلَك كراسي،
و رجاله بشنبات!
معرفتش تختار إختيار بسيط أوى،
معرفتش تختار الست الوحيدة،
اللى حبيتَك بجد، و حبيتها.
عارف ليه؟
مش عشان الظروف،
ولا عشان كلامهم،
ولا عشان عقلك قالك عكس كده...
لا.
عشان أنتَ راجل جبان!
منفوخ اوى من بره،
و عيل صغير، ضعيف من جوه.
حاربت الدنيا كلها علشانك،
حطيت قلبي عل خط النار،
عشان بس أحميك،
حتى من نفسي.
و أنتَ عملت إيه علشاني؟!
عشقتني فى السر،
حلمت بيا بينك و بين نفسَك؟
بس كنت برضه جبان...
جبان لدرجة،
إنك مقدرتش تطلع للدنيا بحبيبتَك،
و تقولهم:
إن هي ده الإنسانة الوحيدة اللى إخترتها.
مقدرتش تدافع عن نفسك ولا عني،
مع إنك كنت تقدر.
يا ريتَك كنت راجل قليل الحيلة،
كنت عذرتك و سامحتك.
كنت ضعيف و جبان،
مع إنك كنت تِملُك،
كل اللى يخليك شجاع.
و النهارده بشرحلك،
أنا ليه سيبتَك،
و رميتَك بره قلبي ببلاش،
من غير حتى وداع.
لإنَك متستحقش،
حتى كلمة "سلام".
حتى صمتي كان زيادة عليك.
و هحرق روحي،
لو رِجعِت تِحِن لراجل زيك.
أنا ست حُرَه و قوية،
و ميشغلنيش راجل ضعيف زيَك.
و مَسَلِمِش قلبي غير لقائد حقيقي،
قولاً و فعلاً.
مش هتشوفني ولا هتسمع عني،
ولا حتى فى أحلامَك.
و إوعى تفتكر،
إني كنت بحاول فى حُبِنا،
عشان أرضيك!
لا.
أنا كنت بزود نارَك،
و بخلص ضميري.
كنت بعمل،
اللى لو بصينا عليه فى حكايتنا بعد سنين،
يخلص ضميري،
و يفكرك كويس أوي:
(قد إيه أنتَ كنت شخص جبان).
رنا راشد
*عمل أدبي هدفه الشفاء،
لا يَمُت لحياتي الشخصية بِصِلَة.
Comments