Je t’aime
- Rana Rashed
- Nov 29, 2025
- 1 min read
بس لما حبيتَك...
بس لما حبيتَك...أبتديت أفكّر أكتر.
مش إزاي أعجبك،
لكن أزاي أخليك مُعجَب بنفسك أكتر.
بقيت أخاف أتكلم،
أو أفكر،
أو أتحرك بسرعة،
زي زمان.
بقيت بتأنى، و بفكر ألف مرة، قبل ما أتصرف أو أقولك حاجة.
أحسن فى مرة،
أعمل أو أقول حاجة تجرحك.
مقدرش أشوفك مجروح، أو تعبان.
مقدرش إن الهوا يلمسك بطريقة تضايقك.
بَحِس إنى مش عارفه أتنفس كويس،
و أنتَ مش مبسوط.
و لو الدنيا أذيتَك، ممكن جداً أموت من القهر.
بَحِس إن إختباري فى الدنيا،
بقى صعب اوى بعد ما قابلتَك.
بقى عندي حد أخاف أخسره.
و أنا اللى عمري، ما خوفت أخسر حاجة أو حد!
حتى الحياة نفسها، لما ساومتني على حياتي...
قولتلها إقتليني.
بس بقيت بخاف عليك...
يمكن أكتر ما بخاف على نفسي.
بخاف تنساني.
بس بخاف أكتر،
تفضل معايا فى يوم من الأيام و أنتَ تعيس،
بس عشان متجرحنيش.
عايزاك تختار سعادتك،
حتى لو على حساب تعاستي فى بُعدَك...
مش عايزه أبداً،
أشوفك بتقتل نفسك،
حتى عشاني.
أنا كده كده هعيش من بعدك،
و كنت عايشه كويس من قبلَك.
بس معاك،
بقيت بعرف أعيش،
لإني حبيتَك.
بقيت بعرف أحِس...
لإن الدنيا بقى فيها حد يستحق أحِس عشانه.
و أنا اللى لفيت شرقها و غربها،
ما غَواش عيني غيرَك.
أنت الحقيقة الوحيدة،
فى دنيا كلها سراب،
ما عَدا اللى خلقها.
و أنتَ الجنة،
لو كان في جنة على الأرض.
و قلبَك هو ملاذي الآمن،
مهما لفيت شطوط و بِحار.
لو بِعِدت عني فى يوم،
هموت من بعدك سنين...
بس بعدها، هعيش على فكرة،
إن اللى حَب مش زي اللى محبش.
إن اللى عاش عمره كله و مَحَسِش،
عُمرُه ما عاش .
و أنا عيشت بجد.
لما حبيتَك ♾️
رنا راشد
(عمل أدبي، هدفه الشفاء)
Comments