أسمراني

دخلت عليه محل الجزم و الشنط و هو باصص فى التليفون بيتفرج على ماتش.

أول ما شافني إبتسم إبتسامة ممزوجة بقلق إحنا الإتنين فاهمين سببها فى صمت.

طلعت الشنطة من الكيس بهدوء و طلعت البطانه و شاورتله عليها:

"شايف مكتوب إيه؟ جلد صناعي، و إنت قولتلي إنه طبيعي"

بص فى الأرض ثوانى فى خجل و هو مرتبك و بيتلعثم فى الكلام:

"أصلها مكتوبة بالإنجليزى و معرفتش أقراها الصراحة كويس."

إبتسمتله و بصيت فى عينيه عشان اتأكد من صدقه:

"و فرق السعر اللى دفعته؟ طب صلي عالنبي..."

قاطعني بدون تفكير و كملي الجملة بخشوع:

"عليه أفضل الصلاة و السلام..."

إتكلمت بصوت واطي شويه عشان ميسمعناش زميله اللى جنبه فى المحل:

"هاخد مع الشنطة جزمه ألبسها فى العيد، و كده نبقى خالصين."

بص فى الأرض فى حيرة و تذمر و هو بيدور على كلام يقوله.

عرفت ساعتها إن ضميره لسه شغال، و قررت أسامحه، بس بعد ما أخد حقي.

قولتله:

"لو الجزمه مش هتطلع من عينك هاخد الشنطة و أمشي و مسامحاك فى الفلوس..."

بَصِلي بعشم و طيبة مصرية معهودة و هو بيقول:

"نَقي اللى إنتشى عايزاه."

بصيتله و انا من جوايا فخورة بالجينات المصرية اللى مستحيل تِجَلي لو إتلمست بطريقة صح.

قولتله بفكاهة:

"و هتعملي شاي عشان تصالحني!"

إبتسم و مشي فوراً نحية الكاتل و هو بيجهز كوباية الشاي.

نقيت جزمه سوده بكعب و قيستها و هو بيقلب الشاي.

حطيت تمن الجزمه فى ظرف جوابات كنت محضراه فى شنطتي بسرعة و هو بيحطلي الجزمه فى كيس جديد...

إديته الظرف و هو بيديني الكيس.

فتح الظرف و هو مستغرب و قالي:

"ده تمن الشاي؟!"

ضحكنا إحنا الإتنين على القافيه.

بصتله و قولتله:

"ده عشان خاطر جدعنتك، و عشان مجيش عليك بزياده، و عشان حاجتكم حلوه و هجيلكم تانى إن شاء الله."

بَصِلي بِحُب الأخ لأخته و هو بيرجع الظرف و بيقول:

"الجدعنه ملهاش تمن. عليا الحرام من ديني هتلبسي الجزمه فى صلاة العيد و إعتبريها هدية مني ليكي، إنتى زي اوختشي."

أخدت الفلوس و الجزمه و روحت البيت، إستعداداً للعيد.

♥️🎈🔥

رنا راشد

#واحة #الشفاء