"أنا اللى شوفت"
- Rana Rashed
- Mar 14, 2025
- 1 min read
أنا،
أنا اللى شوفت اليأس،
بيعمل إيه فى البنى آدمين
شوفته بياكل قلوبهم من جوا،
بيحولهم وحوش!
عشان كده ربنا قال:
"لا تقنطوا من رحمة الله"
و قال:
"الشَّيْطَانُ يَعِدُكُمُ الْفَقْرَ وَيَأْمُرُكُم بِالْفَحْشَاءِ ۖ"
" وَاللَّهُ يَعِدُكُم مَّغْفِرَةً مِّنْهُ وَفَضْلًا ۗ وَاللَّهُ وَاسِعٌ عَلِيمٌ"
مهما ضاقت، إوعى تيأس!
بشوف بروحي:
اليأس و هو بيفتح أبواب الجحيم جوه النفوس!
و هو،
بيأسهم من الحب،
يرمي الملايكه فى أحضان وحوش.
أنا اللى شوفت،
اليأس من إن الظالم يسمعك،
او يسمحلك تدافع عن نفس.
أنا اللى شوفت،
نفسي،
و أنا بقطع حتت من نفسي،
عشان أنقذ بيها ناس تانيين.
أنا اللى شوفت،
روحي بتتسحب فى أرض غريبة،
و قلبي بيصلي،
ميموتش غير فى طيبة.
أنا اللى شوفت،
و من ساعتها،
مبقتش بشوف.
الناس شايفني شايفه،
و أنا عاميه،
بس من غير رخصة!
رنا راشد
Comments