الأنثى الظلامية

من المُحزن رؤية إن (معظم) نساء القرن الماضي غير قادرين على (التفكير) السليم بشأن علاقاتهم العاطفية.

و هذه الفجوة تنعكس بشكل مرعب اليوم على مجتمعاتنا و تؤثر على أساس المجتمع، المتمثل فى منظومة 'الأسرة'.

من الواضح أن كثير من النساء لا زالوا يتخيلون أنفسهم، على هيئة الأميرة المسجونة فى القصر العاجي، التى تنتظر رجل جبار القوة ليتقدم و ينقذها.

اعتذر عن تحطيم أحلامك مقدماً، لكن الواقع الموجود فى الحقيقة و ليس فى رأسك يَنِص:

١- لما تجري ورا راجل عشان يحبك و يتقدملك و يتجوزك، عمره ما هيتحول هو للعاشق الولهان اللى هيكسر الدنيا عشانك، بل هتفضلي طول عمرك الست اللى عطف عليها و إتجوزها، و هتفضلي تقومي بدور الرجل طول حياتك.

٢- لما تقعدي فى البيت وظيفتك نفس وظيفة الإسفنج فى قاع المحيط:

هتتجوزي 'راجل عادي' فى نفس مستوى رجالة عيلتك.

إلا لو كنتي سيدة أعمال مشهورة أو فى جمال و أناقة الأميرة فوزية، بس حتى الأميرة فوزية هربت من قصر جوزها أمير إيران زمان بعد الجواز و نزلت القاهرة عاشت حياة عادية فى شقة بسيطة وسط الناس لوحدها.

٣- لما تتجوزي راجل بيخونك قبل الجواز و عينه زايغه و مبيركعهاش،

يا ريت تكوني محترمة لحقيقته اللى عرفتيها قبل الجواز،

و تكوني متوقعة إن بنسبة ٩٠٪؜ الوضع ده هيستمر بعد الزواج و إحتمال يزيد.

٤- يا ريت متخلفيش منه عشان تربطيه بالعيال، عشان العيال بشر ربنا بيحطهم أمانة فى إيدينا، مش مكنة تحسين سلوك للرجال و النساء الغير مقومين فى بيت أهاليهم.

صدقوني:

الست متحكمة فى كتييييييير اوى فى حياتها، و تقدر تختار مصيرها.

بس الست الظلامية، الكذابة:

- هي اللى عايزه تعيش دور الكتكوته الضحية طول حياتها،

- تختار غلط و تتوقع نتيجة خيالية.

- تحب غلط و تلوم على اللى حبته ليه إتصرف زي ما كان بيتصرف معاها اصلاً من الأول.

- تخلف ولاد فى أوضاع غير إنسانية، بعدين تشهد المجتمع على حياتها الفاشلة كإن في حد غما عينيها و ربطها فى السرير عشان تخلف بالعافية.

انا ست بحب الستات و بدعمهم بكل حاجة عندي.

لكن عُمر ما هيجي يوم و أدعم او أوافق على كلام:

الست "الموهومة" بنفسها.

لإن مواجهة 'الحقيقة'، هو أقصر طريق للشفاء.

كل الحب

رنا راشد

#واحة #الشفاء