البنت الشبعانه

قولت قبل كده مليون مرة السنين اللى فاتت، و لسه فى ستات بتقع فى نفس الغلط:

• هو مبيتكلمش ليه؟ مكسوف؟ خايف؟ بردان؟

طب أعمله ساندويتش حلاوة و أغطيه بالليل يمكن يتكلم؟

طب يمكن لون شعري مش عاجبه؟ لو غيرته هيتكلم؟

#الخلاصة:

الراجل الحقيقي (اللى هما نُدرَه الأيام ده)، راااجل.

يعني صلب، قوى، واضح، صريح، ليس مغاور.

لو الراجل ده عايزِك فعلاً، و إنتي الست اللى كان بيدور عليها طول حياته (يعني ماليه دماغه من الأخر)...هيتكلم!

هيعبرلك.

هيكسبك.

هيلاقيكي لو تحت سابع أرض.

و لو معملش كده معاكي،

يبقى مش انتي الست اللى مخلوقة من ضِلعُه،

مش شايفِك جوه دماغه مراته من الآخر.

📌 و لو فضلتي تجري وراه عشان يلاحظِك بالعافية، هتتحولي من أنثى كَرَمها ربنا و وضع لها حقوق و واجبات فى إطار زواج مقدس، لأنثى بيتسلى بيها كل راجل زهقان شويه، زي اللب و السوداني بالظبط.

📌 و كل مرة بتسمحي لنفسِك تكوني فى الدور ده، بتنزل من طاقة أنوثتك اكتر، و بتسترجلي اكتر، فبتجذبي بطبيعة الحال رجال أنثويين اكتر.

⛔️ (دايرة عقيمة لو دخلتيها، صعب جداً تطلعي نفسِك منها بسهولة). ممكن تاخد سنين و علاج نفسي بمبالغ طائلة عشان تنتهي!

الراجل الحقيقي، السَوي:

سالِك، واضح، و صريح فى خططه معاكي، لإنه بيحترم نفسه و بيحترم وقتِك، و خايف يخسَرِك.

ده الراجل الوحيد اللى ينفع للجواز،

و يصلح يكون أب مسئول عن أسرة و حياة كاملة بحلوها و مُرَها.

لكن، أي راجل لفاف، دوار، مش واضح، متلاعب...لا يصلح للجواز و الخلفه.

و لو فضلتي تجري وراه عشان يتجوزك بالعافيه...

((هتظلمي نفسِك و ولادِك فى المستقبل اوى)).

دورِك الوحيد تكوني ست كاملة، رقيقة، و ذكية

(فى عصر قَل فيه النساء، و زادوا الذكوريات اللى فكرتهم الوحيدة عن الأنوثة الشعر و الماكياج).

دورِك الوحيد تحفظي نفسِك جوه بيتِك.

و جوزك هينزل لسابع أرض عشان ياخدِك،

لإنِك مراته قدام ربنا من قبل حتى ما تتجوزوا،

و انتي مخلوقة من ضلعه.

📌 مش هيعرف يكمل حياته من غيرِك بعد ما يعرف إنِك موجودة.

و العائلات، الأبهات و الأمهات المحترمين:

📌 يا ريت تفهموا إن تربية البنات مش أكل و شرب و زعيق فيهم و شدة عليهم بس!

البنت لازم تطلع مدلعة و شبعانه حب من أبوها و أمها (الاتنين)!!

عشان لما يبعتلها الشيطان راجل ناقص عايز يتسلى بيها، تعرف ترميه تانى بسرعة للشارع اللى جاي منه و متسمحش له أنه يتسلى بيها.

البنت الشبعانه حب فى بيت أهلها،

ميملاش عينيها أنصاف الرجال.

و العكس صحيح تماماً، البنت اللى حاسه إنها مش متشافه من أهلها، ممكن اي كلب خسيس يستغل جوعها للعواطف.

تم ♾️

رنا راشد

#واحة #الشفاء