الحب داخل الجحيم

فى لحظة غضب و عتاب،

قالتله ياسمين بعصبيه فى رسالة صوتية:

"انا بكره اليوم اللى عِرِفتَك فيه!

و بكره قلبي،

عشان دَقِلَك غصب عني!

و بكره عقلي العقلاني،

اللى بخالفه كل مرة عشان أفضّل معاك!"

و بعدها بساعات قليلة، بعد ما نامت ياسمين ساعة مُتَقَطِعَة مليانه كوابيس...

صِحيِت من النوم مرعوبه فجأة و هي بتترعش،

و خافت فجأة أحسن حبيبها يحصله حاجة،

و تبقى ده أخر جملة يسمعها منها!

مسكت التليفون بأقصى سرعة و حاولت تمسح أخر رسالة بعتتهاله...بس للأسف معرفتش تعمل كده.

ضغطت زر التسجيل بسرعة و عقلها الغربي بيمنعها تنطق الكلام اللى قلبها الشرقي بيقوله:

"انا آسفه...آسفه إنى مَنِنتَك بحُبي ليك.

أنتَ مطلبتش مني إنى أحبَك...

انا...انا اللى حبيتك...

و غصب عني و عنَك...

هفضل أحِبَك!

و لو رِجِع بيا الزمن من تانى...

هرجع و أعيش كل اللى عيشته معاك من أول و جديد، حتى و لو هتوجع أضعاف الوجع اللى إتوجعته،

عشان بَس أقابلك تانى،

و أحِبَك."

و بقول لياسمين:

متحسيش بالذنب يا عزيزتي. و إفهمي كلام التنمية البشرية و علم النفس، إسمعي كلامهم لما يقولولك إن العلاقة ده سامة. لإنها ممكن فعلاً تكون سامة.

بس يا ريت قبل ما علم النفس يِنَظَر عن الحب و العشاق، يفتكر إن حتى اللى اتولدوا جوه الجحيم، من حقهم هما كمان يحبوا.

و إن اللى عايشين جوه الظلام، مكنش هينقذهم غير نور الحب، من قلب حبيب مخلص.

و إن اللى اتولدوا جوه النور، مكنش هيخلي لحياتهم معنى و يصحي روحهم،

غير حبهم لملايكة الجحيم...

عارفين ملايكة الجحيم؟! عمركم قابلتوهم؟

عارفين الناس اللى كل ظروفهم غلط، كل حسبة العقل بتقولك تبعد عنهم، كل حاجة جوه عقلك بتصرخ بمجرد ما تقرب منهم!

بس روحك، روحك بترتوي بحبك ليهم!

و كإنك، بتكفر عن ذنوب البشرية كلها، بمجرد إنك تحبهم حب صادق ملوش أهداف!

و كإنك بتقول للماتريكس:

"إذهبي للجحيم بحساباتِك الرخيصة، انا عارف قلبي حَس إيه، و عارف هيجرالي إيه، بس برضه مش هتخوفيني و تمنعيني أحب اللى حبيته!"

يا ترى،

عمرك صادفت الحب ده⁉️

و لو صادفته،

إتصرفت معاه ازاي؟!

مِشيت و إختارت نفسك؟

ولا عملت زي ياسمين ما عملت و قولت:

"و لو رِجِع بيا الزمن من تانى...هتوجع أضعاف الوجع اللى إتوجعته، عشان بَس أقابلك تانى،

و أحِبَك."

رنا راشد

#واحة #الشفاء