الست المصرية: أصيلة

من أصول و أساسيات الست المصرية الأصيلة،

إن لما الراجل بتاعها يكون تعبان او بيمر بأزمة، و عمال يطلع هَمُه و هبله فيها...إنها تسكت، و تصبر، و تستحمل...مش عشان العيال بس، لا.

هي بس بتستناه لغاية ما عوده يشتد، و يقف على رجليه كده، و يرجع أحسن من الأول بإذن الله.

بس بعد ما يمر الموقف على خير...

زوجها العزيز لازم يحضر نفسه،

لإنها هتطلع عليه كل البلا الأزرق اللى طلعه عليها وقت زنقته 😂

أجمل حاجة فى الست المصرية، إنها ست بجد، لإنها مبتعرفش تمثل ولا تتصنع.

بتعرف تحب بجد، و تخدم اللي بتحبهم من قلبها.

و عشان كده، لازم تخلص حقها مِنَك أول بأول. مش هتعرف تنام جنبك، و هي كارهاك.

او، تضربك تحت الحزام من ورا ضهرك. لإن الخيانة مش فى طبعها أصلاً.

مع اي ست تانيه، انت ممكن ترتاح اوى و تتكيف.

لكن مع الست المصرية، انت بتتربي من أول و جديد بِحُب، و بتتعلم إزاي تكون راجل أحسن.

راجل بجد،

قوي،

مُمَكن،

و يستاهل إنه يتحب من ملكة فرعونية،

زي الست المصرية.

#بإختصار:

الست المصرية هتستجدع معاك اوي،

لو كنت جدع،

و هَتِعمِلَك برضه ظبط زوايا و إتزان،

لما تِقِل عقلك و تسوق الهبل على الشيطنه. 😂

الست المصرية أصيلة،

و سدادة فى كل المواقف الحمدلله.

أصل يا عزيزي بعد فترة من عيشتك فى الدنيا، لما الحياة و الشهوات تسرقك، مفيش حاجة بترجعك لرُشدَك و هيبتك كده كَ ملك مصري، فرعوني

(بعد شبشب الست والدتك طبعاً، اللى ممكن يرجعني أنا شخصياً عن كلامي)...

غير قرصة وِدن من زوجتك حبيبتك،

الست المصرية المناضلة، الغلبانه معاك.

بس الأكيد،

إن الست المصرية عمرها ما هتتخلى عنك أبداً فى زنقه، سواء كانت معاك او سايباك، بعد عذاب كتير معاك طبعاً.

لإنها شِبه مستحيل تمشي و تسيبك،

بس لو مِشيِت...مبترجعش تاني أبداً 💔

لإنك بتكون للأسف سِقطِت من نظرها كراجل،

بسبب إنها استنزفت كل محاولاتها إنها ترجعك لعقلك، و أنتَ برضه خذلتها.

و هي كملكة بتحترم نفسها جداً،

مش هتقدر تسلمك نفسها،

غير و هي شايفاك ملك زيها.

♾️🤍

رنا راشد

#واحة #الشفاء