القط الذى أنقذ حياتي

عادة بينقذ حياتك طبيب شاطر؟

أو صديق مخلص...أو صلاة لربنا فى ساعة إستجابة.

بس فى ٢٠١٨ فى ولاية فلوريدا فى أمريكا، على قد ما أقدر أفتكر من الفترة ده، أنقذ حياتي قط سميته "بندق".

القط ده للأمانة مكنش عندي اي نية إنى أتبناه. أنا كنت يومها بس رايحة ملجأ القطط أنزلهم كراتين أكل و دوا، و ألعب معاهم شويه و أمشي.

بس بندق كان معروف عنه هناك إنه عنيد، و عنيف، بيتخانق كتير و مبيسمعش الكلام، عشان كده كذا بيت وقتها إتبناه و إتخلوا عنه تانى، عشان مقدروش يستحملوا طبعه.

بندق أول ما شافني نط بره القفص و إتعلق فى هدومي، و قعد يمسح راسه فيا، و لإنى بفهم الحيوانات و خاصة القطط، حسيت إنه بيقولي "إتبنيني، خديني معاكي البيت، متسبنيش هنا لوحدي!"

و فعلاً رغم كل المنطق، خلصت ورق التبني كله، و إشتريت كل مستلزماته فى ساعة واحدة و روحنا مع بعض البيت.

و بصراحة، كنت زهقانه منه و من نفسي لإني أخدت القرار ده، كنت وقتها معيدة فى الجامعة فى أمريكا و سينجل، عندي عربيتي و بيتي، و عايشه فى أجمل مدينة فى الولاية، أخر حاجة كنت أتمناها إنى أشيل مسئولية قط مش من سلالة مميزة، (ده كان تفكيري المتجرد من المشاعر وقتها، كنت أنانية جداً).

بعدها بساعات قليلة، مرض بندق مرض شديد من غير سبب، بطل ياكل و يتحرك، كان شكله كإنه بيطلع فى الروح. بصراحه خوفت عليه جداً، و خوفت أكون أنا فشلت و كنت سبب فى موته.

جريت بيه على غرفة طوارئ الحيوانات فى نص الليل، فضلت سهرانه جنبه، و نسيت ان عندي محاضرة فى الكلية تانى يوم بدري. فضلت أعمله كمادات على عينيه، و أنقطله دوا فى بوقه زي ما الدكتور قال، حاولت أنام، لكن فتحت عنيا بسرعة، خوفت يتعب و انا نايمة و ميلاقيش حد يلحقه.

فضلت حاضناه و صاحيه للصبح، و كلمت مديري إعتذرت عن الشغل، ضحيت عشان بندق، القط اللى لسه معرفوش! رغم إنى ممكن مضحيش كده خالص عشان ناس أعرفهم.

بعد أسبوعين، قام بندق بالسلامة، و لحسن و سوق الحظ، مرضت انا مرض شديد جداً، كان جسمي بينهار بلا سبب واضح او مرض، و الدكاتره عملوا كل الأشعة و التحاليل اللازمة و برضه فشلوا فى إنهم يلاقوا السبب.

طلبت منهم ساعتها انى أروح بيتي، و مضيت على كده، و أنا مش عارفه مصيري، بس كنت حابه لو حصلي حاجة، تحصلي على سريري، مش لوحدي وسط حيطان المستشفي فى الغربة.

ساعتها جالي إلهام من ربنا مضاد للمنطق، بيقولي "هتبقي كويسه، متخافيش، خليكي نايمه و فى يوم هتصحي كويسه"،

و فعلاً، يأساً من كل الحلول، نفذت أمر ربنا، و حطيت القرآن جنب راسي، و نمت، و كان بندق ملازمني فى كل لحظة، نايم بالظبط عند رقبتي فوق قلبي و سامعه دقات قلبه. كان بياكل قليل اوى، و مبيلعبش خالص، كان مبيفارقنيش لحظة، حتى بيروح معايا الحمام.

وقتها كان أملي فى النجاة ضعيف، و مات أملي فى الإنسانية أكتر، لما إتصدمت إن أقرب الناس ليا، اللى كان إسمهم فى تليفوني كل يوم، بطلوا حد يطمنوا عليا! و كإنهم خلاص إعتبروني ميته، من قبل حتى ما أموت!

ساعتها إبتديت أتحسن، يوم عن يوم، و كل يوم، أملي فى حقيقة إلهام ربنا ليا بالشفاء كانت بتبقى حقيقة اكتر.

و إيماني فى قدرة بندق على شفائي بأمر ربنا، أصبحت يقين!

يمكن بندق القط الضعيف الصغير اللى مش بيتكلم، مكنش قادر يديني الدوا، ولا يطبطب عليا، ولا ياخدني المستشفى لو تعبت! بس هو كان قادر، يحبني بكل قوته لغاية ما وصلت للشفاء.

حب بندق ليا، و تخلي أعز الأصدقاء عني فى المحنة ده، كان يقين مهم إتعلمته عن الدنيا ده:

"إن الحيوانات هي الكائنات الوحيدة اللى عرفت الحب الحقيقي و تقدر تعلمه لينا، لكن إحنا! متعلمناش غير الأنا و قولة يلا نفسي و هاخد كام و إمتى؟"

الحيوانات أصدق و أنظف ما خلق ربنا على الأرض، و هما اللى هيعلموك فعلاً الحب، مش البشر.

لو حابب فعلا تعرف يعني إيه حب، و لو حابب تشوف رحمة ربنا على الأرض:

💖 "ساعد حيوان" 💖

كل الحب ♾️

رنا راشد

#واحة #الشفاء