حُب الأفاعي
- Rana Rashed
- Jan 12
- 1 min read
فى ناس بيعوزوك بس،
و أنت بعيد!
بتحلى فى عينيهم بس،
أول ما تختار نفسك.
حاطينك جوه دماغهم،
فرد فى لعبة!
حتة شطرنج،
فى دور،
هما فيه الملك،
و الجنود،
و الملكة.
فى ناس مبتعرفش تحب،
بتعرف بس تخطط و تتحكم فى اللى بيحبوهم.
لإن ده الحب اللى عاشوه زمان،
مع اللى علموهم الحب.
حب مريض، مليان مخططات و مهاترات.
حب منزوع الأمان، خطر، و محفوف بالانكسارات.
الناس دول مساكين، لإن عمرهم ما هيلاقوا الحب.
عايشين يقارنوا ناس بناس،
يوقعوا حد و يطلعوا غيره.
بيشتروا و يبيعوا ناس بناس!
بيتعاملوا مع أنفسهم كإنهم آلهة الحب على الأرض!
و إن اللى خسرهم بسبب أفعالهم،
كإنه خِسِر حياته،
و فرصته الوحيدة فى الحب!
بس بينسوا حاجات مهمة اوى:
- إن الحب رزق.
- و إن خير ربنا اكتر من خيرهم بكتير.
- و إن ربنا بس، هو المتحكم فى قلوب العباد، مش هما.
و إن اللى خلقهم،
خلق غيرهم كتير،
و أحسن منهم بكتير كمان!
مش فى الشكل بس لا،
فى القلب،
و المنطق،
و الأخلاق،
و المعاملة!
(الجمال، معاملة)
و
(الحب، عِشرَه!)
و الإنسان الجميل اللى إتعمل الحب عشانه،
و اللي يستاهل إننا نبذل عناء فى علاقة عشان نحبه:
هو الحنون،
جميل الطباع،
و المنطق،
و القلب.
هو اللى ميسيبش حبيبه "يشقى" جوه دماغه،
عقاباً على حُبُه له.
رنا راشد
Comments