حُب خواجّات

بصيت لمدينة فينيكس من فوق الجبل العالى و أنا بتأمل شكل الطُرُق و أضواء العربيات البعيدة جداً...

بعدين شديت نَفَس من الشيشه البناتي اللى لونها زهري و عليها إسمي (جيبسى) و أهرامات الجيزة من قدام.

فجأة قطع حبل أفكاري صوت ريمون:

"اصبُلِك شاي ولا قهوة؟"

و كعادة اي شخص برجه الطالع ميزان،

ضَيَقت عنيا فى حيرة و انا مش عارفه:

"مش عارفه أقرر! ممكن تختارلي انتَ؟"

من غير اي تردد و فى حركة خفيفة أخدت منه بس ثواني...خلط ريمون الشاي مع القهوة فى كوباية واحدة و مد إيده نحيتي بالكوبايه!

بصيت للكوباية بإشمئزاز و ذهول:

"إيه القرف اللى انت عملته ده؟!"

بَص ريمون للسما فى تسليم:

"انتى مودك دلوقتى سكلانس،

جربيه بس و انتى هتحبيه."

بصيت جوه الكوبايه و انا بتأمل منظر البُن و الشاي و هما مخلوطين سوا فى الكوبايه...

بعدين بصيت لريمون كالعادة عشان أخد قرار،

قالي:

"جربيه!"

شربت شفطه و كحيت من قوة الطعم!

بس بعد ثوانى من سريان السكلانس فى دمي...

حسيت و كإن فى شبابيك بتتفتح جوه دماغي!

فجأة هاجمني الحزن كعادته من دون سبب:

"مش القعده ده يا ريمون، شبه "المقطم" عندنا فى القاهرة؟!"

سِكِت ريمون و بَصِلي نظرة الصديق اللى حَس بِتُقل قلب صاحبه:

"إنسي يا جيبسى...إنسي عشان تعرفي تعيشي"

كعادته عارف بيعمل إيه،

و قبل ما أبص لتراب الجبل و يهاجمني الحزن،

قطع حبل أفكاري:

"إنتى عمرك حبيتي قبل كده؟"

بصيتله بدهشة،

أول مرة ريمون يسألنى سؤال حريمي زي ده:

"اه...حبيت مرة قبل كده."

إستشف ريمون نتيجة العلاقة من غير ما اشرحله اكتر و سألني:

"و مكملتوش ليه؟"

ضحكت ضحكة صغيرة ساخرة:

"حَبِني حُب خواجات."

سأل ريمون فى دهشة:

"يعنى إيه؟!"

بصيتله بفكاهة:

"حُب خواجات...

عارف الحب ده...

اللى بيخلص عند حدود مصلحتك؟!"

هز راسه لتحت و قال بنبرة صوت قاطعه عليها:

"خواجّات فعلاً!"

ضحكت ضحكة عاليه مَلا صداها الوادي:

"انا فهمت على فكره انت كان قصدك تقول إيه!"

بَصلي ريمون و هو بيضحك بشقاوة:

"حُب الخواجّات مبيدومش ماي فريند!

إشربي السكلانس."

تم.

رنا راشد

#واحة #الشفاء