حِيَل الأغبياء

#رسالة:

لما شخص وسخ اخلاقياً، يعرف إنك شهدت على ظلمه و إجرامه و سكتت...عشان تحمي ناس تانيه أبرياء ملهومش ذنب، كان قول الحقيقة هيأذيهم.

لما ميعرفش يكسرك ولا يوقعك فى الغلط، بيستخدم أخر حيلة دفاعية وضيعة عنده، و هي انه يدمر سمعتك قدام اقرب الناس ليك.

بيحاول إنه يشكك اللى من دمك فيك، يطردك نفسياً بره بيئتك من غير طرد. يحاربك بأقرب الناس ليك. عشان يخسرك حبهم و يكسرك عن طريق هجرهم ليك.

عايز يخليك تتكسف من ذنب انت معملتهوش، و عايز يشغلك عن وساخته، و يرهبك عن قول حقيقته للعالم، عن طريق إجبارك إنك تحارب عشان تحافظ على سمعتك رغم برائتك.

ساعتها صعب تلوم على الغريب إنه عمل فيك كده. ولا ينفع تستغرب لما إبن الحرام تيجي منه الخيانة، لإن ده كان متوقع و معروف من الأول.

كل ده مش هيكسرك...

مش هيكسرك غير حاجة واحدة...إن اللى من دمك يصدقه و يكدبك. مش هيكسرك، غير إن اللى ياما شاف خيرك يصدق عنك شر عمره ما شافه منك. يصدق الغريب، لمجرد إنه عرف يقنعه. او يمكن قريبك ده، كان اصلاً بيحقد عليك من الأول، و مستنى بس الفرصة اللى تمكنه إنه يكرهك علناً.

ساعتها بس، هتكتشف انك كنت غريب وسط أهلك من الأول. بس أنت اللى كنت بتحاول تشوف الحلو و تخدع نفسك.

للأسف، الجنس البشري، أسهل جنس يتضحك عليه من الأشرار بخداعهم، و أسرع جنس بيظلم الكويس، لمجرد إن نوره بيعكس ظلام الآخرين.

وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ ۝ فَسَبِّحْ بِحَمْدِ رَبِّكَ وَكُن مِّنَ السَّاجِدِينَ ۝ وَاعْبُدْ رَبَّكَ حَتَّىٰ يَأْتِيَكَ الْيَقِينُ.

[الحجر:99]

و اعبد ربك...حتى يأتيك اليقين.

صدق الله العظيم 🤍

رنا راشد

#واحة #الشفاء