حبيتك من قبل ما أقابلك
- Rana Rashed
- Apr 2, 2025
- 1 min read
#رسالة لك:
كلمتك من غير ما أكلمك...
و شوفتك من قبل ما نتقابل...
صورتك،
بحذافيرها،
و تقاطيعك،
و نظرة عينيك...
اللى بتحضن كل اللى يبصلها...
و عِرِفتَك...من قبل ما أعرفك!
لما رَسَمِتَك العرافه الغجريه على بحر كاليفورنيا،
و انا ماسكه فى إيده،
و خاتم جوازنا فى إيدي اليمين.
رَسَمِتَك الغجرية...
و مكنتش أعرف أنت مين...
ولا ليه مش هو اللى فى الصورة!
مكنتش أنتَ اللى فى خيالي...
ولا كنت أعرف...
إنى فى يوم هسيبه و أقابلك.
يومها،
كَدِبت الغجرية...
و عايرتها بإنها عرافه!
مكنتش أعرف يومها،
إنى هبقى مكانها.
ولا كنت أعرف يومها،
إنك موجود فى الدنيا...
ولا كنت أعرف،
إنى هفارق حد قضيت نص عمري معاه...
ولا كنت أعرف،
إنك هتقابلني و أقابلك،
صعب عليا أفرق بين حلمك و حقيقتي.
و صعب عليك تدخل حلمي...
بعد ما رسمته سنين لوحدي.
بس حاسه...
يمكن لو إتقابلنا...
يمكن لو قربنا اكتر شويه...
لو بصيت فى عينيك...
يمكن أفتكر كنت مين ليا،
فى حياة تانيه...
بعيد عن رتابة و زيف الحياة ديا.
يمكن...
أعرف قابلتَك ليه...
و العرافه رَسَمِتَك ليه...
و ليه سِبتُه؟
و ليه حبيته؟
و ليه مَحَبِتَكش انت من زمان؟
و ليه اتأخرت عليا كل ده؟
رنا راشد
*عمل أدبي هدفه الشفاء
Comments