رسالة إلى أمى

و فيروز عم بتغني بالخلفية...

و السما فوقي مكشوفة، و فاس عم تلمع بعيد بالمدى،

تذكرتك يا أمي، و تذكرت فيروز الصباح، و تذكرت شو كنا نعمل الصبح أول ما نفيق...نشرب قهوة، و نسمع فيروز و هي عم بتقول:

"قديش كان في ناس

عالمفرق تنطر ناس

وتشتي الدنيا

ويحملوا شمسية

وأنا بأيام الصحو

ما حدا نطرني"

تذكرت أشياء حلوة كتير،

و تذكرت كمان،

أشياء ما كان لازم أبداً أتذكرها.

تذكرت إنه كِنا دائماً الطرف يلي بيحن اكتر...

يلي بيضحي اكتر...يلي بيعطي اكتر...يلي بيحب اكتر.

و مَرَء العمر يا أمي...

و بعدنا مفترقين،

مِشان قلوب ما بيحنوا بالمرة.

مَرَء العمر و فجأة كبرنا، و صرت خاف تتركيني،

و صرت خاف أتركك. بس هلأ صِرت مضطرة فِل، مِشان الحياة، و أكل العيش، يلي ما بيحن.

مَرَء العمر، و قد ما كِنت خاف منك زمان، صِرت خاف كتير عليكي، و ما عاد عندي شئ خاف عليه اكتر مِنِك.

بعدك بتحني...و بعدي بِحِن...حتى من بعيد...بعدنا ما تغيرنا يا أمي...

بعدنا المَي يلي بتمروء من فوق الحجر،

و بتفنى المَي، و الحجر بيضله حجر...

يمكن فى ناس متلنا هيك يا أمي...

لازم يضلوا المَي...

حتى يضله الحجر صامد...

و حتى يضل النهر ماشي...و حتى تستمر الحياة.

بس عم حاول يا أمي،

بعدني عم حاول كتير...

عم حاول ما كون مّي فوق حجر مِتلِك...

بعدني عم حاول...

لاقي نهر أكبر، يحتوي كل المَي يلي فيني،

من دون ما ضَل أنا كل مرة يلي بحن.

🤍💚

رنا راشد

#واحة #الشفاء

واحة #الشفاء