زوجي المستقبلي

أحب جوزي المستقبلي يكون:

• حَلال مشاكل درجة أولى من غير ما يحسسني إن فى مشكلة اصلاً

• نزيه فى فلوسه و مشاعره و كلامه، يديني كل اللي عنده، و هو حاطط حسن نية إني هعمل نفس الحاجة عشانه

• راجل متلمسوش، و متضحكوش، و متملاش دماغه ست غيري (حتى لو عجبته ظاهرياً)، راجل ميعرفش ريحته ولا عينيه ولا لمسته غيري

• راجل تقيل، و بطئ، و عقلاني جداً فى كل خطواته، ثابت زي الجبل، ساند ضهري، مهما إتهزت الدنيا حوالينا، أفضل ثابته فى حضنه

• راجل صلاته لربنا، و ضميره، و أهل بيته، عنده درجة أولى، يحترم أمه و يصرف على أخته لو إحتاجت، يبوس راس أبوه، و يلاعب الأطفال فى الشارع، و يحمي ستات غيره، من غير ما يكون عايز منهم مقابل.

• راجل عينيه حنينه، لمسته فيها أمان، تشفيني من كل تعب اليوم. قلبه مفتوح لعيوبي قبل مميزاتي، راجل يكون أبويا و أخويا قبل ما يكون جوزي. عايزاه يشوف احسن ما فيا، و يساعدني أحب نفسي فى أيامي الصعبة، زي ما هعمل معاه بالظبط.

• عايزه راجل بيخطط كل حاجة بنجاح و دقة، يصحيني ٧ الصبح و معاه قهوتي المفضلة و تذاكر الطيران و يقولي "يلا أسبوع تركيا؟!" من غير ما أطلب منه. يكون حاجز كل حاجة و مرتبها، من اللحظة اللى هتحرك فيها من بيتي، للحظة اللى أرجعله تانى فيها.

• عايزه راجل يقولي كتير "متخافيش و انتى معايا"، "متشيليش هم يا أميرتي، انا هتصرف فى الموضوع ده، إنتي بس ريحيلي جمالِك"

• عايزه راجل كله طاقة ذكورة، يعرف يدلعني، يعاكسني و يظهرلي أنوثته جوه عينيه و قلبه، قبل ما يقولي "إلبسي حلو عشان تعجبي صحابي"

• عايزه راجل بجد. راجل أنام فى حضنه و أغفى و ألعب و أهزر و أرقص و أتدلع و انا مطمنة، حتى لو فى حرب حوالينا، هكون مبسوطة برضه لو موتنا سوا

• عايزه راجل يفضل يفكرني كل يوم إحنا ليه سوا، بالحب، و الصدق، و العشرة الطيبة. راجل مصحاش ولا يوم فى حياتي ندمانه إنى إديته قلبي.

• عايزه راجل نضيف فى شكله، عقله، نواياه، عايز يعيش حياة رايقة و سليمة و مسالمة. عايزه راجل مزاجنجني، يحبني أرقصله بالليل و أرصله الشيشه و أعمله ماساج بالليل، و احنا لسه مخلصين صفقة بيزنس بمليون جنيه الصبح. و لو فى مرة ضاقت بينا مادياً، نتعشى نص بطن، و نكمل عشانا حب و أحضان و روقان.

عايزه راجل كده، و مستعده أكون له، رحمة ربنا على الأرض. و أحَوِل بيتة من حيطان لجنة، و أحول قلبه من مضخة دم لتحفة تجريدية من الشغف و الحياة و الإبداع.

عايزه يكون لي الجبل  🏔️

و أكون له البركان 🌋

عايزه يكون لي القمر 🌖

و أكون له الشمس ☀️

☯️✨🔥

رنا راشد

#واحة #الشفاء