سبب خراب البيوت

سبب كبير فى خراب حياتكم و أنتوا متعرفوش للأسف هو صوركم و مشاهد حياتكم و مظاهركم المستعرضة على السوشيال ميديا.

فى حالتين الإنسان بيكون آمن روحانياً و طاقياً لما ينشر حاجة عن حياته على السوشيال ميديا:

١- لو بيشارك اللحظة او الإنجاز كجزء من هدف حياته كمؤثر او صانع محتوى، (بنية تشجيع ناس تانيين على الخير و النجاح). و صفاء النية هنا بيشكل ٩٠٪؜ من الحماية الطاقية، إن نيتك تكون خالصة لله تعالى و مش بتنشر من باب المُرآة (التفاخر أمام الناس)، لكن فعلاً عشان تغير حاجة فى مجتمعك.

٢- لو بتنشر لحظات سعيدة بتعيشها فى دايرة خاصة و مقفولة وسط ناس بيحبوك (من نفس مستواك و إمكانياتك)، يعنى بإختصار يقدروا يشتروا و يعملوا اللى انت بتشاركه و أكتر. بتنشر معاهم حياتك من باب الوَنَس و متأكد فعلاً إنهم بيحبوك و عايزين ليك الخير، و هيفرحوا لفرحك، مش هيقارنوا نفسهم بيك.

بس حتى الحالة ٢، فى الزمن ده أصبحت للأسف مجازفة كبيرة لسببين:

١- الطاقات الشيطانية إتمكنت من البشر بسبب قلة دينهم، و بسبب حرب المنافسات الإجتماعية المستمرة، على السوشيال ميديا...و ده خلى حتى أقرب الناس ليك ممكن غصب عنهم يدخل قلبهم الحسد و الحقد لما يشوفوك بتعمل او بتعيش حاجة هما مش قادرين عليها.

٢- احياناً كتير بننشر مظاهر أقرب الناس لينا ميقدروش يحققوها لأنفسهم، و ده غصب عنهم بيخليهم يحسوا بالقِلَة و الدونية لأنهم بيحسوا إنهم مش قادرين يجاروا رِتم حياتنا و يكونوا حوالينا، غير لما يطلعوا لمستوانا.

• و ده لها حَلين:

١- يا تطبق مبادئ الزكاة و الصدقة من منطلق (الأقربون أولى بالمعروف)، و توزع من الخير اللى ربنا مَن عليك بيه على قرايبك و أحبابك، و تشبعهم حُب، عشان تسبق وسوسة الشيطان جوه قلوبهم.

٢- يا تتبع مبادئ الطبقات الراقية إجتماعياً، و نصيحة الرسول محمد (عليه أفضل الصلاة و السلام)، و تمنع نفسك من إنك تتميز عن اللى حواليك علناً. يعني تلبس حاجاتك الغالية لوحدك، و تحتفظ بلحظاتك السعيدة جوه gallery موبايلك لإستمتاعك الشخصي فقط.

لكن صدقوني و الله العظيم، و ما أقسم به هباءاً قَطاً.

بشوف الطاقات السلبية و هي بتنهش فيكم روحانياً بعينيا، بعد ما بتشاركوا كلام او صور عن علاقاتكم، أولادكم، او نجاحاتكم علناً على السوشيال ميديا،

من غير منفعة إجتماعية واضحة.

إسأل نفسك دايماً:

• هل المعلومة اللى بشاركها ضرورية؟

• هل هتفيد الناس اللى هيسمعوها فى حياتهم؟ هل هيتعلموا مني حاجة؟

• هل بشاركها من باب إنى أفيد الناس فعلاً فى حياتهم؟ ولا بحاول أغطي على جرح نَفسي عندي؟ أو أعكس صورة عن حياتي غير واقعية علناً، عشان أتجنب الإحساس بالفشل لوحدى؟

الحقيقة، إن العيب عمره ما كان فى السوشيال ميديا. السوشيال ميديا مجرد أداة، و وسيلة رائعة.

إتعملت عشان تقرب المسافات، و توقد الحب بين الناس اللى مش قادرين يتقابلوا بسبب بُعد المسافات و التوقيتات.

لكن، العيب فينا و فى اللى حوالينا،

لما بنفتح حياتنا للطاقات الخارجية من غير ما نفكر، و بننسى كَم الشياطين و الظلام اللى بنمنحهم تذكرة "دخول مجاني" و سهل لحياتنا، لما بنشارك و لو صورة بسيطة اونلين من غير تفكير.

لازم دايماً نسأل نفسنا سؤال بسيط:

• هل بنشارك من باب نشر الحب و الوِد، ولا المَنظَرة قدام الناس؟

لو المنظرة هي الهدف،

يبقى الأفضل لينا نمسح البوست،

و نشتغل إننا نوكد ثقتنا فى نفسنا من الداخل،

مش من الخارج.

صدقوني، كصانعة محتوى شاهدني الملايين (بفضل الله تعالى) على مدار ٦ سنوات فاتوا،

📌 مفيش اي عدد من التفاعلات ولا اللايكات هيرمم ثقتك فى نفسك المكسورة.

📌 و مفيش اي مبلغ من المال هتكسبه على السوشيال ميديا، هيصلح الدمار النفسي و العائلي اللى هتواجهه بعد مشاركة حُرمات بيتك على السوشيال ميديا.

📌 أتحدث لمنفعتكم العامة، و ليس للإنتقاد. ولا أنكر وقوعي فى نفس الخطأ اللى كلمتكم عنه، مِراراً و تكراراً.

لكن بحاول أتعلم من أخطائ و أتغير للأحسن طول الوقت.

ربنا يحمينا كلنا من ذَلات أنفسنا و شرورها. ♾️

رنا راشد

#واحة #الشفاء