طريق الشيطان
- Rana Rashed
- May 1
- 2 min read
إوعاك تفتكرني ساذجة عشان روحانية!
من و أنا صغيرة، صغيرة اوى...كان عندي صفة مرعبة فى شخصيتي، مش نعمة، زي ما الناس شايفينها.
كنت بشوف الرداءة فى شخصيات الناس، و النور، و الخبث، و الطمع، و الخير!
كنت بَشِم ريحة الشيطان، و هو داخل على الغير عشان يغويه!
كنت بعرف اللحظة و الدقيقة، اللى الحب بيتقلب فيها لِكُره ضدي. كنت بشوف كل ده، و بَسكُت!
كنت بَسكُت من الخوف، خوفي من ربنا أولاً، و من أحكام المجتمع ثانياً، و من خوفي لأظلِم اللى قدامي بإحساس، لسه ملوش أساس فى الواقع.
📌 لكن المهم:
إوعى تفتكر إنك لما تتخابث عليا، و تتعامل بخِسَه و نداله...انى مش شايفاك!
او انى ساهيه عَنَك، او اني حتى خايفه نردوا عليك!
لا، أني مبنخافش غير من ربنا اللى خلقني.
لكن بَسكُت، و اديلك فرصة، ترجع لنفسك، ترجع لربنا...بكون بقول جوايا و انت بتخدعني...سيبيه، يمكن يرجع، يمكن ضميره يوجعه...يمكن يصون لقمتين العيش و الملح اللى ما بينا، و يرحم طيبتِك معاه و يِحَكِم ضميره.
لكن لا، للأسف. علمتني حياتي، إن طريق الشيطان، مفيش أسهل منه.
و علمتني برضه، إن المشي فى الخير، بقى صعب! مستحيل...زي بالظبط ما تكون بتنحت بضوافرك فى الصخر! و مكمل رغم نزول الدم.
انا مكنتش بسكت عن الشر عشان غبية، او عويله، او منقدروش نردوا عليه، الطاق طاقين و تلاته!
انا كنت بسكت عشانك...عشان حسابك قدام ربنا، بقى تقيل! يمكن أديك فرصة، تخففوا على إيدي.
لكن للأسف، اللى بيدوق طريق الحرام مرة، و سهولته...صعب اوووى، يرجع تانى يشقى بالحلال.
و هي ده صعوبة الشر! ان دخوله سهل، سهل أوى، أسهل من شَربِة الميه...
بس الطلوع منه بعد ما الشيطان جابك عنده!
خد بالك:
📌 هيكون بطلوع الروح، يا روحك، يا روح حد بتحبه.
هي ده لعبة الشيطان فى الأرض، اللى ياما نحتت فى الصخر بإيديا، عشان مرميش بنزين جواها.
فى وقت ما انت كنت فاكر انك بتستهبلني،
كنت بنقذك...و انت من واخد بالك!
كنت بفاديك بنفسي، لإنى جايه من الدم
اللى يتحمل الابتلائات،
و انت لمؤاخذة يعنى، ربوك ناس...
نَفَسهُم قُصَيَر اوى على الحلال. 📚
رنا راشد
Comments