عدل ربنا فى أرضُه
- Rana Rashed
- Apr 5
- 2 min read
#رسالة لك فى هذه اللحظة:
لما كنت بتكسر الضلمه...فاكر؟
لما كنت بتشعل شمعة 🕯️ فى عز ما انت كنت بتغرق فى ضلمِتَك، فاكر؟
لما كنت بتكتب كلام للناس، ملقيتش حد يقولهولك، عشان تصبر نفسك و غيرك بيه...لإن الدنيا كانت شايفاك ثااابت...و انت كان بينك و بين المجهول، شعرة! فاكر؟
كل الحاجات ده معدتش مرور الكرام. كل مرة وقفت فيها فى عز ضعفك...
كل مرة...إبتسمت، و انت قلبك بيبكي من جواه، و بيتكسر مليون حته...
كل مرة، سندت غيرك بأخر جنيه كان معاك، و انت مش عارف، هتاكل بكره ازاي؟
كل مرة ابتسمت فى وش الناس، و انت الوجع بيقطع كل حته فيك من جوه...عشان خايف توجع غيرك بوجعك، اكتر من انك تتوجع شخصياً!
كل مرة كنت عارف فيها إنك عندك حدود إنسان، بس إتصرفت فيها بقوة ملاك، خلقه ربنا خارق لقوانين الطبيعة...و انتَ، عارف انك مش خارق!
المرات ده أنت افتكرت انك بتستجدع مع نفسك صح؟ انك بتوَجِب مع غيرك؟ انك بتتصرف زي ما اتربيت من أهلك؟
((غلط! ))
لو مكنش ربنا اختارك! مكنش ثَبِتَك!
اسمعني تاني!
لو مكنش...ربنا اختارك! مكنش، ثَبِتَك!
اختارك تكون فى مواجهة مباشرة مع قوة الظلام، اختارك تكون خصم مباشر للشيطان.
الشيطان مش بس إله الشهوة....لا، ده إله اليأس.
الشيطان بيلم أرواح بشر كتيييير اوى، عن طريق اليأس.
و ربنا، هو رب الأمل و الصبر و الموازين اللى مستحيل عدلها يخيب، و لو بعد حين!
ربنا اختارك، عشان تكون صوت الأمل و العدل و الميزان فى الأرض، حتى فى عزززز انكسارك!
متخليش الشيطان ييأسَك.
و أعرف كويس اللعبة، إنه كل مرة هتعمل فيها عمل ينشر الأمل للناس، هتتضرب بعدها علطول من الشيطان فى إيمانك بالدنيا.
لما ده يحصل، إوعى تيأس او تتهز، او تجري تانى نحية عاداتك القديمة، إوعى تِسَلِم لليأس و انت فى قمة ضعفَك!
لو عرفت تعمل كده، بأكدلك انك هتدخل فى تردد المعجزات،
و هتشوف فعلاً: عدل ربنا فى الأرض، و لو إجتمع كل البشر ضدك!
لإن ده عهد ربنا فى الأرض، اللى ميشهدوش، غير المؤمنين اللى زَيَك!
خليك مؤمن، خليك صابر، خليك صامِد.
(و انَماَ الصبر، بالتَصَبُر) ♾️
رنا راشد
Comments