علمتني أمي

علمتني أمى:

١- الست لما تحس إنها بتتذل، من اي حد فى الدنيا، لازم تحارب! إن كرامتي هي أغلى حاجة عندي، و لو شخص حاول يسرقها مقابل إنه يوفرلي قوت يومي، إنى أقوم و أشتغل أحسن من ١٠٠ راجل و أصرف على نفسي بنفسي.

علمتني أمى:

٢- مسمحش لنفسي أكون شهوة، لمجرد إن الراجل اللى قدامي عايزني! أنا مش جارية، و من حقي أدافع عن نفسي و شرفي و أرفض اي شخص فى اي موقف و اي وقت.

علمتني أمى:

٣- إن الست الغالية اللى بتحترم نفسها، مينفعش تسمح لراجل رخيص، و ملكيته عامة يلمسها، حتى لو كان جوزها.

علمتني أمى:

٤- أكون ست و راجل لنفسي، عشان أعرف أفرق كويس، بين الراجل الحقيقي، و الذكر المسترجل.

علمتني أمى:

٥- إنى طول ما بصلي لربنا، مفيش إنسان له حكم عليا، ولا يقدر يأذيني.

علمتني أمى:

٦- إنى أتعامل مع اي موقف أتحط فيه، مهما كنت شايفه إنه صعب او مستحيل. ما دام ربنا كتبلي إني أتحط فى الموقف ده، يبقى مستحيل ربنا هيكلفني أكتر من قدرتي.

علمتني أمى:

٧- إن الحرية مش فى القلع و اللبس، الحرية هي الصِدق. الصِدق فى الأفعال و الأقوال و الضمير. و إني طول ما أنا بحترم نفسي، محدش يقدر يهيني. و طول ما بقول الحقيقة، هعيش حياة حقيقية، و طول ما بجامل على حساب نفسي، هفضل مستعبدة.

علمتني أمى:

٨- إنى أخضع للراجل و أقدسه، فقط لما يبقى يستحق لقب "رجل".

علمتني أمى:

٩- مترجاش حد. و مظهرش ضعفي قدام الغريب. أمشي على رجلي و هي مكسورة، بس مطلبش مساعدة من إنسان خسيس.

علمتني أمى:

١٠- إن اللى بيجي بسرعة بيروح أسرع. إنى أصبر، و أصلي، و أشتغل كل يوم. و فى يوم من الأيام، ربنا هيحققلي المعجزة، مهما طال الزمن.

علمتني أمى:

١١- إن ست واحدة مضحية، ب ١٠٠ راجل أناني.

❗️و أنت؟يا ترى علمتك أمك إيه؟

🤍♾️♥️

رنا راشد

#واحة #الشفاء