غريب الحب

لما بنراجع ذكرياتنا، بنلاقي إن الحب غريب اوى. اوى كمان.

خاصة الحب الكبير اللى من بره الدنيا ده.

و أصعب حاجة فيه نظرية "الشعرة"

شعرة بين القرب و البعد.

شعرة بين الشغف و الكبرياء.

شعرة بين إنك تقابل حد عمرك ما كنت متصور تقابله، و شعرة...بين إنك تخسره للأبد!

ساعات بنقسى فى أوقات مينفعش نقسى فيها.

بنستغرب طبع اللى بنحبهم، مع إننا شبهم بالظبط!

و عشان كده حبيناهم اصلاً.

يا ريتنا كنا بنسمع صوت أفكار اللى بنحبهم، اكيد كانت مشاكل كتير بينا و بينهم هتتحل بإبتسامة.

من سنتين، لما فقدت شخص عمري ما اتخيلت أفقده...عرفت بجد معنى الحب.

عرفت...إنك ممكن تتخانق مع حد بتحبه، عشان بتحبه.

و تسلم عليه بعصبية،

و تمشوا كل واحد فى طريقكم،

و انتوا متأكدين إنكم هتتقابلوا تانى...

و تصحى فجأة تلاقي الشخص ده،

مبقاش موجود فى الدنيا.

ساعتها بتتعذب عذابين،

عذاب إنه مبقاش موجود،

و عذاب إنه مِشي من غير ما تلحق تصالحه.

تقوله إنك بتحبه فعلاً لأخر مرة، تقوله إنك مبسوط اوى إن حصلت معجزة كونية جمعت طريقكم مع بعض، حتى لو كان لفترة من الوقت.

♾️

رنا راشد

#واحة #الشفاء