فى حياة تانية

بصيت لعينيه فى الصورة مرة أخيرة...

و الناس كلها مبهورة بكلامه،

كُنت أنا مبهورة بِصمت عينيه...

عينيه اللى بيحكوا قصته،

من أول ما أتولد،

لغاية ما قابلني...

كانوا بيكلموني...

بيطاردوني فى أحلامي...

بيقولولي،

إحنا واحد!

متمشيش و تسيبينا...

خليكي.

بس أنا،

أنا اللى قَدَر الغجر مطاردني فى كل حياة...

بصيت لصورته نظرة أخيرة و أنا بمشي فى طابور نحية باب الطيارة...

و همستله كإني شايفاه:

"فى حياة تانية يا حبيب روحي.

فى حياة تانية...

هنتقابل من تانى،

فى الوقت الصح...

و المكان الصح!

فى حياة تانية،

يا أجمل تحفة فنية شهدتها...

هقرأ عينيك...

عَن قُرب فى العَلَن...

مش عَن بُعد فى السر.

عايزاك بس تعرف...

إنى قريت القصة اللى حكيتها عينيك...

و حَفَرتَها بحروف دمي...

جوه قلبي."

♾️

رنا راشد

#واحة #الشفاء