قبل ما تحكم

الكل بيحكم عليك طول الوقت!

المتدين، اللى ربنا فتح عليه بشوية خشوع، ماشي يقيس إيمان الناس كلها بالمظاهر، و كإن خلاص ربنا مَلِكُه حساب السماوات و الأرض، عشان قام الليل.

و الغنى، اللى ربنا رزقه فلوس، عشان يكون سبب فى إسعاد اللى أفقر منه، ماشي يقيم نجاح كل اللى حواليه، بماركة عربيتهم و فلوسهم فى البنك…و كإن اللى أعطاه الخير، ميقدرش سبحانه يرجعه فقير فى ثانية.

و اللى ربنا فتح عليها بالستر و الحجاب، ماشية تقيس كل بنت حواليها محتشمة ولا منحلة!

على أساس طول او قصر تنورتها، و كإنها نسيت! إنها كانت فى يوم من الأيام بتلبس زيها، او كانت ممكن تتولد مكانها، و تلبس أقصر منها…او…إن الهادى اللى هداها، قادر يدوقها ذل الذنب و يردها تانى لسوء الخاتمة.

و المتعلم، المثقف، المتمدن، القوى، الوسيم…

كل ده أمثلة لنِعَم (مشروطة) بستر ربنا عليك عشان تدوم.

كل ده نِعَم ربنا أنعم بيها عليك…عشان تكون خليفته فى الأرض…عشان تحمي الضعيف، و تستر المفضوح، و تداري نقص المحتاج…

📌📌 مش عشان:

((تتحول لربنا فى الأرض))

رنا راشد

#واحة #الشفاء