"كِش مَلِك"
- Rana Rashed
- Dec 22, 2025
- 2 min read
#رسالة منها،
لأحدهم:
مشكلتك إنك عمرك ما قابلت ست زيَك!
لإن كلهم كان بيلبسوك العِمَه،
لغاية ما ياخدوا اللى هما عايزينه مِنَك!
و بعدين يرموك،
و يروحوا للي يقدر يديهم أكتر.
بعدين يقولولك أعذار كاذبة،
عشان بس متكرهومش،
لإنهم أجبن،
من إنهم حتى يبقوا،
خِصم معاك.
مش كده؟
مش ده اللى كان بيحصلك طول حياتك؟
لإنك فاكر إنك أذكى راجل،
خلقه ربنا فى الخليقة.
و ده بالظبط،
سر غبائك 🗝️
📌 بس أنا أول ست هتقولك حقيقتك:
كان ربنا بيخلص منك ذنب،
اللى عملته فى الطيبين.
من اللى بيعملوه فيك الأشرار،
اللي شبهَك.
لا أنتَ مش طيب زي ما بتقنع نفسك،
أنتَ ذئب،
بس لابس رداء خروف.
لإن معندكش شجاعة،
إنك حتى تبان شرير!
قد إيه أنتَ جبان.
اللى عملته عشانك،
اللى عمرك ما عرفته،
ولا هتعرفه،
من غير اي مقابل.
كان بس كرامة لروحي،
اللى عرفت روحك،
من حياة تانيه.
لكن قلبي،
عليه حِصن منيع،
أنتَ عمرك ما دخلته.
ولا هتنول شرف دخوله،
طول حياتك.
شخصيتك،
متستاهلش حتى لحظة من وقتي.
لأنك متستاهلش غير الرخيص،
اللى شبهَك.
خسارة روح كبيرة زيَك،
تبقى جوه شخصية خسيسة بالشكل ده.
بتلعب بالناس،
كإنهم حتت شطرنج،
بتحركهم على مزاجك،
لإنك طبعاً،
فاكر نفسك أذكى واحد فى اللعبة.
بس أنا،
أول ست هتقابلها،
أذكى مِنَك بكتير.
أول ست هتعَرَفَك إحساس،
ال "كِش مَلِك".
مع إنك مش مَلِك،
و عمرك ما هتكون.
أخرَك تبقى ذكر،
قائم على لعبة،
"حريم سلطان".
ربنا هو اللى وراني حقيقتك،
لإنى ملكة،
و ميلقيش بيا غير ملك زي.
أنا أغلى ست،
كنت هتمتلكها طول عمرك،
بقلبك،
مش هتشتريها بفلوسك.
عشن كده كان لازم أختبرك كويس،
و أشوف كلامهم عنك،
صح ولا إفتراء.
و الحمدلله،
طلعت أسوأ،
من كل اللى إتقال.
مش هتشوفني تاني،
ولا حتى فى أحلامك.
متسألش عني،
ولا تدور عليا،
ولا تتخيل...
إني ممكن أصلاً أكون،
لراجل زيك.
مبقاش فيك شئ يغريني.
♾️💎👑
رنا راشد
📌 عمل أدبي هدفه الشفاء، و أي تشابه بينه و بين حياتي الشخصية، هو من نسج خيالك.
Comments