متسامحش حد
- Rana Rashed
- Jan 18, 2025
- 2 min read
متسامحش اي حد:
كَسَر النور جواك و مِشي،
كإنه معملش حاجة!
متسامحش اي حد:
كان عارف إنه بيأذيك و كمل فى أذيتك،
فقط لإنه:
ضَمَن شَرَك!
متسامحش اي حد:
كان عارف إنك بتتوجع و تتألم و تموت من جواك،
و مفكرش برضه غير فى مصلحته.
بس محتاج تشكر الناس اللى زي دول فعلاً!
لإنك قبلهم،
كنت فاكر الناس كلها عندها نفس قلبك.
كنت فاكر إنك مش هتتأذي،
طول ما إنت إنسان كويس.
كنت فاكر إنك لما تحب كل الناس اوى،
هما كمان لازم يحبوك.
مش مضطر تسامح لو انت مش جاهز...
مش مضطر تنسى،
و تتعامل معاهم عادي كإن محصلش حاجة!
لازم جرحهم يفضل جواك،
و لو حتى على شكل ندبة،
عشان يفكرك دايماً،
إن مش كل الناس تستاهل (تشوف روحك).
و فى ناس فعلاً تستاهل!
لكن فى ناس،
عشان تكون فى مأمن من شرهم،
لازم تتعامل معاهم كإنك رجل آلي.
تتوقف تماماً عن الشعور بيهم و معاهم،
و تبتدي تحسب كل تصرفاتهم بعقلك و بس.
و لإن التعامل معاهم مرهق و متعب لقلبك،
لازم تخلي مدة التعامل معاهم قصيرة قدر المستطاع،
حفاظاً على سلامتك النفسية و العقلية.
تأكدت بعد سنين طويلة من محاولة التشكيك فى الفكرة ده،
إن فى ناس فى الدنيا ده مخلوقة بس عشان تورينا:
شكل الكره،
و الضغينة،
و إنعدام الضمير.
و مهما حاولت انت او غيرك تحبهم و توريهم صورة مختلفة عن الحياة،
هيفضلوا متمسكين بأدوارهم كأشرار.
لإنهم امتهنوا الشر،
حبوه،
بقوا بيتلذذوا بيه!
مبقاش مجرد حاجة محتاجين يعملوها عشان يحموا نفسهم (زي ما حصل معاهم زمان.)
لا،
دول عشقوا إستغلال الناس النقية اللى زيك،
و سلب منهم قدرتهم عن الحب،
عن طريق تيأيسهم من فكرة إن الدنيا لسه فيها خير.
عايزين يحولوك شبههم بالظبط!
لو انت فى الموقف ده بقولك:
الدنيا ده لسه فيها خير كتير اوى،
بس مش هتشوفه،
غير بعد ما تبطل تسمح للناس دول،
إنهم يلمسوا قلبك و روحك.
رنا راشد
Comments