مفتاح سعادة المجتمع

للأسف الشديد احنا واخدين فكرة إن اللى بيتعالجوا نفسياً هما المختلين عقلياً بس!

لكن فى الحقيقة، واحد من أشجع و أنبل القرارات اللى ممكن تاخدها فى حياتك، إنك بدل ما تدفع ١٠٠٠ جنيه فى كافيه عشان تقعد ساعتين تتعشى و تشيش.

الأفضل إنك تصرف الفلوس ده على جلسة مع معالج/ة مختصين نفسياً، يساعدك او تساعدك تعالج جروح طفولتك، تفهم مشاعرك، و تحط حدود صحية عشان متقعش فى علاقات سامة تتعبلك نفسيتك اكتر، عشان تعرف تربي ولادك صح، و تتعامل بشكل صحي فى شغلك، و تعرف ازاي تمنع الحياة من إنها تكسرك، عن طريق إنك تتعلم تكون صحي و صلب نفسياً.

اليوم اللي هيتحول فيه العلاج النفسي فى ثقافتنا من رفاهية إلى (ضرورة)!!

هنبتدي بس ساعتها بس نشوف أجيال صحية، و فنانين عارفين يأدوا رسالتهم، من غير ما ينشروا معاها ظلامهم، و رجال دين عارفين يفهموا الناس عن ربنا من غير تخويف و إرهاب، و أصدقاء و أحباب عارفين يعيشوا الحياة صح بسعادة مع بعضهم البعض، من غير ما يدمروا بعضهم نفسياً.

للأسف برضه فى فكرة مغلوطة إنتشرت عن العلاج النفسي إنه ملوش لازمه، بسبب بعض الدكاترة النفسيين معدومين الضمير، اللى كل فكرتهم عن العلاج، إنهم يخدروا المريض طول حياته بالأدوية النفسية، عشان مكسلين او غير قادرين اصلاً على العلاج السلوكي، اللى بيساعد على تفكيك صدمات الطفولة و تغيير أنماط التفكير المؤذية اللى بتجذب لحياتنا مواقف و علاقات سامة.

📌 و وجب التوضيح، إن الأدوية النفسية ضرورية لبعض الحالات، لتسكين أعراض بعض الأمراض النفسية، لكنها غير قادرة على علاج المرض من جذره، من دون المداومة على علاج سلوكي بجانب الدواء.

📌 نصيحتي لك تداوم مع معالج/ة مختصين فى العلاج السلوكي المعرفي (CBT) لإن هو ده اللى هيفيدك. و تتحرى كمان الدقة جداً فى إختيار معالج/ة مناسبين، بعد البحث و السؤال عن تخصصهم، عشان تاخد كل اللى انت محتاجه من الجلسة صح!

و ثق فى إحساسك جداً، ٥٠٪؜ من قدرة المعالج/ة على علاجك، هو إرتياحك النفسي معاه/ها.

أحياناً و عادة، هتحتاج تلف شويه، و تغير كذا معالج او معالجة، لغاية ما تلاقي معالج/ة عارفين يقرأوا روحك و نفسيتك و دماغك سوا. متيأسش بسهولة، و خليك عنيد فى محاولاتك عشان نفسك.

يا رب ده يحصل، يا رب أشوفه بعنيا، حتى و لو يوم واحد قبل ما أموت.

رنا راشد

#واحة #الشفاء