ينبوع الحياة

بقدر جداً  طاقة الكلمات، لها مفعول سحري عليا.

بقدر طاقة الحب اللى بتطلع فى الكلمة، و بعيشها جوايا لما بقراها، حتى بعد ما تتكتب.

ممكن حد يجيبلي هدية باهظة الثمن جداً، أركنها فى الدولاب من غير حتى ما أفتحها، بس...أجري بسرعة أشيل الكارت اللى جواها و أقراه، كلمة كلمة، و كإنه توقيع من شخص مهم.

بقدر الناس البسيطة، و الأماكن البسيطة، و الهدايا البسيطة...

بقدر اي حاجة لسه فيها روح، وسط بهرجة و شراسة المظاهر المادية، اللى بتتحكم فى كل حاجة دلوقتى،

إلا قلوب الناس الطيبين، اللى مش خايفين يبانوا معيوبين قدام الغير...

عشان فاهمين، إن عدم الكمال، هو ينبوع الحياة.

لكن الكمال، هو الخطوة الأخيرة، قبل الموت الكامل.

رنا راشد

#واحة #الشفاء